Leef Sjansemaekers en Sjansemaekerinnekes.
“’t Is waat ’t is, ich weit noe wat ich mis, höb de vastelaovendj gaer”. Zoeamaar ’n stök tekst oet ’n nummer van Spik en Span. Hiël toepasselijk op ’t aafgeloupe vastelaovesjaor.
Alles waas anges as anges. Haopelijk is ’t òs allemaol gegaeve det we in een gooi gezòndjheid toe moge laeve nao ’t volgendje vastelaovessezoen. En det dit ’n normaal sezoen waertj. Want geine vastelaovendj is väör väöle ’n groeat gemis.
Toch höbbe wae aafgeloupe jaor ’n paar dinge waal kènne doon. Dao bie dinke wae aan ’t vastelaovesäöverlaevingspakket, ’t fruitpakket kläörplaat wedstrijd väör de kinjer vanne Zjwiek, zekebezeuk, ein prachtige collage van aoj foto’s op ós site, op vastelaoveszaoterdig veel bie ederein gratis ’n sjoean vastelaovesgezèt inne bös en op vastelaoves dinsdigmiddig kòste we via ‘nne stream op facebook genete van ’t matinee van de lètste paar jaor. Èn dao steit nog ‘nne sjoeane kwis aan te kome. Ederein dae bie al dees activiteite mèt gedaon en mèt gedacht haet wèlle wae van herte bedanke.
’t Waas good te zeen aan de verseringe en vlagge, en te huere aan de sjoean reacties det we ouch op aafstandj verbònje wore.
Wae wènse ederein eine veilige waeg in een gooi gezondheid nao ’t aoje normaal. Tot volgendj jaor.
CV de Sjansemaekers.
